यो कसी नराई लागि

यो कसी नराई लागि यो कसो उदास
तन यहाँ मन पहाड़ कस् छू यो निश्वास
मैं पहाड़ जूंलो दाज्यू मैं पहाड़ जूंलो
मैं मुलुक जूंलो भागी मैं पहाड़ जूंलो

गों घरका सब लोगन मैं भेटन जूंलो
आम बड़बाज्यू गों घरकी कुशल मैं लि ऊंलो
बाल अवस्था युवा दगड़िया सबन मिली ऊंलो
नानछाना का खेल माल फेरि खेली ऊंलो
चार दिना शुद्ध हवा मा मैं बिताई ऊंलो
मैं पहाड़ जूंलो दाज्यू मैं पहाड़ जूंलो
मैं मुलुक जूंलो भागी मैं पहाड़ जूंलो

नील आकाश सेत हिमाला मैं निहारी ऊंलो
हरियूँ पाणी गाड़ नदी छपछपाई ऊंलो
शीतल पाणी में डुबुकी मैं लगाई ऊंलो
बनफल बाड़ों का फल चटपटाई ऊंलो
म्यर मन कि बात जसि देखि भाली ऊंलो
मैं पहाड़ जूंलो दाज्यू मैं पहाड़ जूंलो
मैं मुलुक जूंलो भागी मैं पहाड़ जूंलो

डांडा काना रूख बेला आँख बसाई ऊंलो
रोज़गार बिकास कस छू मैं ले देखि ऊंलो
और मैं ले के करि सकूं देखि भालि ऊंलो
नानातिना बुड़ा बूड़ीन के सुजौती द्यऊंलो
आपण मुलुक आपण लोगन भलि बटाईं ऊंलो
मैं पहाड़ जूंलो दाज्यू मैं पहाड़ जूंलो
मैं मुलुक जूंलो भागी मैं पहाड़ जूंलो